فزع الحقيقة في الصدمة.. بقلم الشاعر/علاء هشام
علاء هشام
فزع الحقيقة في الصدمة
ساقية وبدور بينا
ومين في أيام الشقا
جاء نواحينا
ومين في أيام العمر
ظلل حوالينا
وشوش وشوش
كلها بتمثل علينا
مافيش مافيش
كل جرح كان بإيدينا
يا عمر مليان حسرة
والله خسارة فينا
أيام كتيرة طويلة
عدت علينا
وكسبنا منها إيه
غير دمع عنينا
يادنيا المراجيح
عمال تضيعي فينا
تيجي تبكينا تضحكينا
خوانة أيامك يازمن
نضحك وتبكي علينا
نبكي وتضحك علينا
بشر مننا وفينا
شياطين علينا
وموج ب يرمينا
ل بحر يودينا
تعب السفر
من خطاوينا
و كل نفس طالع
مش راجع إلينا
عدي المراكبي
شط مآسينا
من غير
مايسمع أغانينا
تعب الكلام
من سرد أمانينا
يعدي الحزن علينا
ينسي ويرجع لينا
تقول عجبوا
السهر في ليالينا
وفين إلي قالوا
وفين إلي شالوا
وفين إلي عمرهم
ماهانوا
وفين إلي وعدوا
إنهم وقت الشدة
يبانوا
حساب الأيام
طلع يخسر
في عز أمانوا
والفكر في حيرة
عمر ما أخد حق
دلالوا
ومن صدقوا
في كذبوا
طلعت أنيابوا
ويقول صديق
خسارة عتابوا
ودا حبيب
حلال فراقوا
ودا قريب بالدم
إبليس في أفعالوا
ودا غريب
مش هموا
غير صحبة أتعابوا
وبنكدب ونداري الخيبة
وأتاري الخيبة غميقة
وبور أراضينا
بيدي محاصيلنا
لغيرنا
ووقت كداب
بلطجي علينا
يلين للخداع
والصادق
يضيع من إيدينا
وجع ودموع
خداع وهموم
ضاع المضمون
والقلب محروم
والعقل مخدوع
تعليقات
إرسال تعليق