أبيضاني وشعره كيرلي...بقلم الشاعرة زكية فيصل

 كلمات زكيه فيصل 

أبيضاني وشعره كيرلي 

أبيضاني وشعره كيرلي هو الأمل اللي فاضلي

ضحكته حلوة وجميله ابني الوحيد الحيله لو حد شافه يقولي 

اسمه يوسف ياناس حد يطمني  انا مش عارفه ايه حصلي 

بالله عليكوا شفوه طمنوني وطمنوه الجميل أبو شعر كيرلي 

كان بيلعب جوة بيتنا سبته روحت اجيب له ياكل كان جعان 

روحت أشوف حبه بندورة عند الجيران عشان مفيش أكل في بيتنا ولا فيه أمان 

قلت أروح بسرعه وأرجع فجأه صوت القصف بسمع وانا عند الجيران 

سبت الأكل من إيديا مبقتش شايفه بعنيا مفيش بيت مفيش بيبان

كنت قافله الباب عليه كنت فاكرة إنه في امان 

حد ياناس يطمني مبتردوش ليه مش سامعني 

الأبيضاني أبو شعر كيرلي خلاص خلاص راح مني 

كان جعان ملحقش ياكل كان بيلعب كان مستني 

قبل ماأسيبه كان بيضحك كان معايا كان في حضني

ذمبه إيه الأبيضاني أبو شعر كيرلي