زعلان...بقلم الشاعر خيري حسني

 قصيدة بعنوان

(زعلان..؟؟؟؟)

زعلان.

زعلان من الدنيا وأفعالها.

وزعلي متفصل  بمقاسي.

زعلان من ناس  كانوا حبايبي.

وهموم متكومه فوق راسي.

زعلان من القهر ومن غربة.

مكتوبة من يوم مامسكت

بقلمي في كتابي وكراسي.

زعلان من ولدي وسند ضهري.

اديته حناني وكان ناسي.

اهملني لما احتاجت لايده.

ورماني وشك في احساسي. 

أنا ال سقيته من دمي.

صب لي عصيانه في كاسي.

زعلان من.......

تعبي ال مش باين ولا ظاهر.

غير إني بقول كلام قاسي.

وإني انسان متأخر ورجعي.

نسيوا إنهم اتربوا من عرقي

ومن فاسي.

زعلان...........

من بنتي وأقول بنتي كلها حنيه

اتاريها رضعت من لبن الجفا 

لما اتولدت ودا اساسي.

زعلان من العمر ال راح مني.

وأنا بضرب أخماسي في 

أسداسي........

وشيطان وشكوك حواء الدائم

ونزاع مكركب لي كيان عقلي

 ووسواسي وخناسي

زعلان........

وبيقولو متزعلش.

إزاي وأنا من لحم ودم. 

وعروق وشرايين وقلب 

بينبض ومشاعر جياشه

ووجدان بروحي وأنفاسي. 

زعلان............

29/7/2023

(ترنيمات وخواطر/بقلم..........)

(شاعر العاميه/خيرى حسنى.)