حسبي الله ونعم الوكيل....بقلم الزجال عبد الرحيم الناضي

 بسم الله الرحمن الرحيم

حسبي  الله  ونعم  الوكيل

                                                              ~~~~~~~~~

 

شعْلُو  فْتيل  لْمدْفَى

نفْخُو  فْ النَّار  هْبُوبْ

زنْدُوها  حْطبْ  وُحلْفا

زَرْعُو  ف الناس  رْعوبْ

الدْمَارْ  عَنْدهُمْ  حَرْفَه

يِتَاجْرو  بالدَّمْ  الْمسْكُوبْ

غَزَّه  زادُوها  شتْفَه

شُوفُو  حالها  مخرُوبْ

قنديلها  بْهات   وُطْفا

وشعبها  ينزف  مَنْكوبْ

من  الكبْدَه  حَيْدُو  قَطْفَه

زادو  ف لأُمَّه  تْقُوبْ

الموت  مْنَاجْلُو  قَطْفَى

جَاعرْ   يَحْصَدْ  مَرْهُوبْ

الْعدُو  فينا  يتْشفَّى

فْ أرْضنا  طامعْ  مرْغُوب

حسْبُونا  قَصْعَه  دْ  السفَّه

غَرْزُو   فْ ضْهُورْنَا   نْيُوبْ

دَرُونَا   لقْمَه  وُ رشْفَه

قالو  هَدا   مَكْتُوبْ 

فتْحُو  شْراجمْ  وُ دفَّه

وتْفَرْجُو  فينا  نْدُوبْ

يِدَابْزُونَ  على  نتْفَه

وُخِيرنا  عَنْدْهُمْ  مَنْهُوبْ

خَلَّاوْ  فْ  حَلْقنا  شَحْفَه

وُهَدا  حَالْنا  مَنْشُوبْ

رْجال  دْمُوعهم  دَرْفَى

شي  مات  والباقي  معطوب

صبْيَانْ  بالعْرَى  والحْفا

من  المْرَارْ  تْجَرْعُو  مَشْروب

نساء  تعاني  فْ  الخْفَا

احزانهم  تْعَمَّرْ  كْتُوبْ

 كُلْشِي  مجموع  ف  كَفَّه

مْوضْرِينْ  تَايْهِينْ  فْ  دْرُوبْ

السْفِينَه  غَادْرتْ  المًرْفَى

گاع  للِّي  فيها  مَجْرُوبْ

الضَّمير  تْعزلْ  تْنفَى 

زْمَان  النِّفاق  وُالكدُوب

يَكْفَى  من  الكُرهْ   يَكْفَى

غسْلُو  حْقَادْ  لْقْلُوبْ

علاش  لْبُعدْ  ولجْفَا  

بَارًكَا  من هاد  المَلْعُوبْ 

هًا   عَارْ  الله  وُ لُوفَا  

وَقْفُو   وَيْلَاتْ  لحْرُوبْ 

عبد الرحيم الناضي