في القبور.. بقلم الشاعر المبدع/شاذلي محمد عبدالرحمن حسين
💐💐💐💐💐 في القبور 💐💐💐💐💐
كام حكاية في المدافن
كام رواية في القبور
كله عاش في الدنيا لكن
عدى من ضمن الطابور
هي إيه الدنيا يعني
غير سعات ولينا دور
واللي فيها الكل ملهي
ناسي إنه في أرض بور
مهما يزرع فيها عمله
طرحه هيسيبه جزور
واللي بعده هييجي ياخده
فيه يكمل أو يدور
أصل هي دنيا فانية
والطريق مليان بذور
واللي هيفيدك يا سيدي
بذرة فيها خيرها زاهر
ولا بذرة من الفجور
يلا ازرع وإنت فاكر
إن تحت الأرض سور
جوه منه ليك مكان
جوه ضلمة أو في نور
وإنت طبعا اللي قادر
تملى في كتابك سطور
فيها معنى للنجاه
يبقى في ختامها السرور
دعوة حلوة من إللى عايش
والحبايب ليك تزور
يلا إدعي بقلب شاكر
ربنا هو الغفور
🌿🌿🌿🌿🌿🌿🌿🌿🌿🌿🌿🌿🌿
اللهم أحسن خاتمتنا وإجعلنا من المكرمين الذين يستحقون جناتك بغير حساب ولا سابقة عذاب اللهم آمين يارب العالمين
شادوليات
شاذلي محمد عبدالرحمن حسين
تعليقات
إرسال تعليق