الكذب والكذاب....بقلم الشاعر د.علي مسلم عجمي
(( الكذب و الكذاب ))…
للشاعر د. علي مسلم عجمي
----------------------
ما شبعت كذب..و بعدك بتكذب كمان
يا ألف عيب الشوم ما عندك أمان
لا أنا و غيري بعد يحترمك حدا
الكذاب تمو فيه أكتر من لسان
مهنة الكِذب ماخذها اعتيادي
بحياتو الما فهش منها إفادة
بيحاول يقنعك في حكي صادق
و كلامو بالكذب واضح و بادي
تخصّص كذب عندو لسان دافق
بخبرة وَصَّلِـت كل البوادي
و وعد عا وعد بالجملة و واثق
بكذبو المتقن و بلسان هادي
على حبال الكذب لَعِّيب خارق
يا عيب الشوم بهدلت المبادي
بدمو الكذب. بالشريان عالق
الصدق ما إلو عندو سِيادي
و لتكريمو بمجالو عالسوابق
نـال من الكذب أرفع شهادة
حبل الكذب ما أقصر خطوطو
بسهولة بتقدر تدَمِّر خيوطو
حكي الكذاب بيخالف ضميرو
و كلامو فرفطو الموج بشطوطو
عأرض الصدق ما حَـدَّد مصيرو
و ببحر الكذب غَـرَّق أخطبوطو
صواريخو الكذب بلشوا يطيرو
و بلا أهداف بيصيرو يشوطو
صدق الصدق معناتو أمانة
و كذب الكذب مـأواه الخيانة
الكذب ما إلو رجلين حتّى
يمشي و للفضيحة جناح تاني
المُخادع كل شي منو تـأتى
غير الكذب و الخدعة الملانة
كيف ما كلمتو الكذاب زَتـَّى
بتتدحرج كرة تلج المعاني
إذا حبيت ..ما تعمل مُخادع
و بكذبك بالهوى تقَلِّـب مواجع
المرأة إذا حَبِّـت زاد فيها
الصدق بالحب وين ما كان واقع
بصدق الحكي قادر تحتويها
لكن بالكذب إبعد و طالع
ما بتقدر بكذبك تشتريها
حتّى لو كنت ساكن بجامع
الشاعر د. علي مسلم عجمي
لبنان
تعليقات
إرسال تعليق