زمان ....بقلم الشاعر شريف الرومي
زمان
زمان كان في في غابة أسد و تلت تيران
أحمر و أسود و أبيض كان في قلوبهم حنان
دايما كان الأسد بيحاول يفترسهم
و هما في كفة واحدة عمر ما صابهم هوان
قام الأسد مفكر في فكرة عشان يسودهم
و يفرق صفهم و يشيع الفرقة بينهم
راح للأسود و الأحمر و قال لهم سيبولي
اخوكم ليا واحدي و بلاش تقربولي
و اضمن لكم حياة مفيهاش قتل و خيانة
انتوا عارفين طباعي أنا من طبعي الأمانة
و سمعوا كلامه خانوا اخوهم و بسهولة
ضاعت الوحدة بينهم و ضيعوا الرجولة
لما الأسد لقاهم بيسمعوا الكلام
استهزى تاني بيهم من غير رمح و سهام
أكل التاني منهم ملقاش منهم مقاومة
ما هو اللي يبيع اخوه بكره تصيبه الالام
قام التور اللي فاضل أستسلم و بسهولة
و قاله يلا خلص ما راحت البطولة
اصل اللي يخون مسيرة يدوق من الخيانة
و اللي يبيع المودة بيضيع الأمانة
شريف الرومي
تعليقات
إرسال تعليق