أنا وصاحب.. بقلم الشاعر/د. إبراهيم القماش
أنا وصاحبي
انا وصاحبي علي القهوة
ساعات بنقول كلام طايش
وهو يبوس اديه ويقول
بحمد الله انا عايش
بقوله في يوم بقالي سنين
وانا قاعد وبستنظر
لا شغل لقيت ولا هيبة ولا منظر
حاولت كتير اعدي الصعب
لجل اوصل ما بوصلشي
وفي الاخربحط في شايي معلقتين
مرارة ويأس واشربهم واقوم امشي
انا في سكةمبرسمهاش
وعمري فيها ضاع في الصبر
وصبري فيهاضاع ببلاش
جاوبني بنظرته الدافية
وصوته الهادي والبسمة
بلاش تيأس دا حتي الطير
بيرمح في السماوولا. بيكل
ويأسك مش هينفع يوم
ولا. هيمل
ساعات الدنيا بتعادي
وايه يعني؟!! دا شئ عادي
تلف- تتوه- مسيرك يوم
تلاقي الدنيا مرسومة علي كف
سعتها تحس بالدنيا
الي جت ضدك
بقت بالجهد من صفك
سالته وقلتله في ثورة
وايه ممكن هيتغير!!!
وايه يحصل غير الحاصل
وحبل الود بينا وبين
املنا خلاص ماهوش واصل
انا مش وحدي في الازمة
وحالي برضو مش ذنبي
انا في طابور
مليه الناس وفيه الفين
طابور جنبي
بناكل بس بنفكر
هناكل بكرة ولا نصوم
ولو غيرنا اكل خيرنا
نسيب القعدة ليه ونقوم
جاوبني وقال: ساعات نسكت
عشان بنخاف
ساعات بنثور ونتكلم
لكن صدقني مهما تعبت
سنابك مهرتك في الرمل هتعلم
بلاش تضعف عشان بلدك
بتحتاجلك سند ليها
هترفعها
تشيلك هي في عنيها
بطرف عنيا بعد كلامه
بصيت بره قهوتنا
شوارع كلها طيبة وحنية
بنادي عليها تنده لي،كمان هيه
وقلت لصاحبي من حزني
بفكر كل يوم اهرب
ودنيا ربنا واسعة
انا هاسعي
واحقق كل حلم حلمته
ما تحققش
مادام حلمي البسيط
جدا حاولت احكيه
ما بتصدقش
لقيت صاحبي شاورلي
وقالي من قلبه
عشان حب الوطن نعمة
ما هنسيبهاش
وطن غيره مفيش فيه
الحنان والعطف
بص وشوف
وشوش الناس
وهي سارحة في
الصبحية
شايلة علي ظهرها
كارتين مليانة
شقا واسيية
وشوش صادقة بتتحمل
ورغم الجرح مش قاسية
ومش ناسية رغيف العيش
والقرش اللي مبكفيش
هموم عبده ولبس ياسين
والا كل اللي عاد بالدين
وموسم في بحر يومين
فيه بط وقمر الدين
وكنافة وفانوس تسنيم
غلابة احنا يامصرين!!
بنموت ياحكومة
انتي فين ؟
ليه سايبة غلا الاسعار
وجنيه فقير بنهار
انت الكفيل ياااارب
و يا صاحبي
عيش بالحب
في وطن عظيم
يتحب
ينادي يدق القلب
لجل تعيش علي ارضه
وحبه عليك ماهش فرضه
لكن برضه اكيد بتحبه
واكتر مني ميت مرة
بلدنا ساعات
كما كل البلاد في الكون
تكون مرة لكن مهما
المرار يكتر تعيش حرة
مشيت م القهوة. افكر
في الكلام كله
سؤال جابني.وسؤال راح بي
اني اللي صح.ولا. الصح
كان صاحبي.؟!!
الشاعر الصحفي
دكتور ابراهيم القماش
مصر
تعليقات
إرسال تعليق