سلطان ف دولتو.. بقلم الشاعر/المحجوب بوسبولة
/////////**سلطان ف دولتو**/////////
كبيت كاسي ياك برزتو
نتسنا من يشاركني فيه
والبراد سلطان ف دولتو
ربي معاونو ويزيد يغنيه
جامع الخير وانا للي شفتو
والكيسان طايعة كاتبغيه
القيتو ليا عز ونيس
قدامي لاحاجة عليه تفصل
فوق السينية حلو وجليس
كلمتو وكللامو اعسل
نعناعو خضر بلباس لعريس
اعجبني ملكني اش نعمل
من عمقو الطيب يتفرق
يتسارى بيا ف لقوافي
صدقني ولى ما تصدق
راضي ناسي حر لعوافي
اسخي وسخاوة منو تشرق
كاسو جودة سخون ودافي
من صغري نعرفو والعنوان
ثلقيمة من العنبوب تفوح
نشيبتو راحة ياك وطمئنان
وقوامو معودة به كل روح
برادي وصديق الخيلان
سبحان الله هجهوج يبوح
كيعاج العطشان ورفاقو
تحلى معاه نغمة بالشوق
ياك يبسم كل عشاقو
ويحضر كل نسمة والذوق
هاهذا برادي بذواقو
كل مافيه ياسيادي ويروق
بقلم صقر الحروف الزجال المحجوب بوسبولة
تعليقات
إرسال تعليق