الإعتذار.. بقلم الشاعر/د. علي مسلم عجمي
( الإعتذار ) للشاعر د. علي مسلم عجمي
----------------
أعتذر لا ما أعتذر مهما جرى
طالما ما ظلمت رجال حتّى أو مرا
حكيي إذا بيكون عنجد و ثبات
عن شخص عايش في حياتو بهوره
أو بنت حالا شايفة بين البنات
و بالمجتمع إلها مواقف مسخره
ليش بدي إعتذر عن هالصفات
و الحكي كلو موثقينو يا ترى
بعتذر لولا خطأ بِلساني صَدر
عن ظُلُم أو عن جهل رَكَّبت العِبَـر
و أحيانا الغيرة بموقعها القبيح
بتجعلك تكذب .و الحكي بسرعة انتشر
بصحوة ضميرك .دوا جبتو للجريح
تْكَفِّـر خطيئة زلِّة لسان و صُـوَر
بتعتذر للمظلوم عن جد و صحيح
تـرَجِّع كرامة هِنتها بين البشر
قالوا فضيلة كاملة بالإعتراف
في خطأ حاصل عن غَبا أو إحتراف
و قالوا فضيلة إعترافك بالخطا
هذي الفضائل قَوَّمِت أي إنحراف
إعتذارك عن حِسِن نيّة عطى
لَمْ شَمل و محا أيـّا إختلاف
بتكون صوب العقل جدَّدت الخُطى
و ما عاد عندك للظلم دورة و مطاف
جرأة و تواضع .فن إنساني كبير
و إتقان بين البشر لكن مش كتير
و الأروع و أبدع ثقافة و إفتخار
عند الخطا من كبير بيواسي الصغير
و لما القوي في قُـوّتو ياخذ قرار
يعتذر من إنسان شو ضعيف و فقير
و الواجب و أوجب..قبول الإعتذار
و هيك بدو يكون مرتاح… .الضمير
الشاعر د. علي مسلم عجمي
لبنان
تعليقات
إرسال تعليق