بياع غناوي..بقلم الشاعرة/عبير محمد
بياع غناوى
*************
بيدندن
وقت العصارى
ماهو أصله غاوى
على شبابيك دنيته ينقر
والحاره سد
نازل فى حيطان المآسى هد
ماشى بين الناس لابيصد ولايرد
نار الحوجه وقت الزنقه
لافحه من السؤال الخد
عيشه ولابد منها ولله الحمد
من كام سنه أتولد نسى
أصله تعب من العد
عايش على رتم الحياه منفى
تاريخ ميلاده بين الشموع منسى
والفرح نوره على الجبين مطفى
بيوزع زكاة عمره ضحك وغناوى
على إللى رايح وإللى جاى
ماهو أصله غاوى
يبيع الضحكه مع الدمعه
بصوت مبحوح
على كتافه جوز حمام
يسمع كلامه ينوح
كاتم فى قلبه
فى وسط أغانيه
بوجعه يبوح
طالع نازل
فى الطريق فحت
ينبش على رزقه
والسنين مرسومه
على وشه
كأنها نحت
لابس قناع لحيته
وهمومه منزلاه لتحت
عم أمين سميع قديم
بيرقص العجاز على صوته
وعيال كتير تصقف له
سلطان غناوى بيدندن
زقزق العصفور
يدندن له
عدت صبيه حلوه
بتضحك له
لابسه الحرير ضاوى
على جمال خطوتها
تتلحن الغناوى
ضحك من قلبه وقال
زينة الصبايا عدت
مشيت على قلبى
من نظره واحده
نار فى ضلوعى ولعت
قلت السلام عليكم
تقلت وماردت
بياع غناوى أنا
طول عمرى هاوى
وعمرى على الحب
ماكنت ناوى
بقلمى
ذكريات العمر
عبير محمد
تعليقات
إرسال تعليق