التضحية.. بقلم الشاعر/د. علي مسلم عجمي
( التضحية ) للشاعر الدكتور علي مسلم عجمي
-----------------
قدرة كاملة واضح مداها
إسِمها التضحية و امها و أباها
أفضل ناس في إلهُم مشاعر
شجاعة تخوض أبعد من مداها
و عندو إنضباط و ما بيكابر
بيقول الحق تا يرفع لِواها
بصوت الحق وقفوا عالمنابر
ضحّوا و كانت الجرأة صداها
الوسيلة الواحدة و أصدق وسيله
تا توصَل للمسافات الطويله
و حطيتو بأمانة وسط عينك
هدف تحقيق للروح النبيله
مهما في طريقك قال مِينَك
ماخِذ كل وسيلة و كل حِيله
كرامة أرضك و عرضَك و دِينك
فداها التضحية مش مستحيله
الرحمة أعمق من الحُب كُلو
أصفى و أطهر و كل شي تجَلُّو
فيها التضحية نكران ذاتك
تسامح و العفو أبيض سجلو
خَللي التضحية أفضل صفاتك
عليها الناس بالإخلاص دَلو
و إذا بالتضحية كانت مماتك
عمرك ما انتهى عايش بيظَلُّو
الأبطال القوايا بكل غالي
ضحُّوا تا الوطن يشمخ و عالي
الشهادة كرامة الأرض المجيدي
شجاعة كاملة و جرأة و بَسَالي
لو نقطة عَـرَق نِزلِت وَحيدي
بأرض المعركة جاوب سؤالي
نقطة دم حَبَّـاتا عديدي
نَبَت منها وطن حُر و مِثالي
حتّى ما تكتب قصيدي
بتضحّي بساعات و ليالي
و إذا ما التضحية كانت أكيدي
بشرع الحُب رح تبقى تسالي
الحب التضحية و لكن فريدي
حقيقي يكون ما يطلع خيالي
شِعار التضحية النفس الزهيدي
و تفاني بصدق يرخص للغوالي
الشاعر د. علي مسلم عجمي
لبنان
تعليقات
إرسال تعليق