على الدنيا السلام.. بقلم الشاعر/جمال زكى عينر
( على الدنيا السلام ) :
كله عايش بالأوانطه
كله بيلكلِك كلام
كله لازم يلوي بؤه
لما يبدأ بالكلام
اللي عايش دور صياعة
واللي سايق في النطاعة
والكلام بقى فيه خلاعة
كل شيء مابقاش تمام
المؤدب يعني سَكَّة
حتى ناسُه منُه فكَة
والحرامي له الف سكه
كله يضرب له السلام
الشباب أشكالها عِكرة
اللي عامل فيها عِترة
واللي ماشي يادوب بسُترة
شيء يداري والسلام
البنات لابسة المقطع
واللبان لازم يطرأع
والدهان في الوش بقَّع
ناقصة تربية وعلام
الصعلوك سَمُّوه اسطورة
بقى بيمثل بقى في الصورة
وبقت ليه افلام مشهورة
بعد ما كان في الخلا بينام
العجوز عامل صبي
عامل فيها أجنبي
رايح جاي بيعاكس جارته
حاجة تكسف والنبي
اللي جاى تفتكره رايح
كله مخلوط كله سايح
كله بيموت في الفضايح
كله بيسرسب كلام
القيامة راح تقوم
والخلايق غطَّه نوم
شاطرة بس عتاب ولوم
قول على الدنيا السلام
قول على الدنيا السلام
بقلمي الشاعر جمال زكي عينر
تعليقات
إرسال تعليق