اِسمع ياخال...بقلم الشاعرة صفاء حسانين
اسمع يا خال
اسمع بقى حكايه ام العيال
انا اتولدت من اب وام طيبتهم أبعد من الخيال
كانو متحملين هموم لو وزنوها توزن جبال
بس عشت بينهم راضيه واني ابص فى يوم لغيري دا كان محال
شوفت سنين يا خال صعيبه وعمري ما قولت دا حظي مال
اتعلمت احلا علام واتعلمت الصبر مهما عمر الظلم طال
بقيت عروسة وقالو فين بقى الخيال جه الحليوه اللي وصفه يتحكي فى موال
قلبي اتخطف مني وبقيت حلاله والحاله احسن حال
طيب مكافح حنين رغم ضيق الحال عارف يا خال بتحسد على صبري معاه وطول البال
جبت العيال يا خال وسموني ام الرجال كنت ام وكنت اخت وكنت صاحبه واكلتهم من مال حلال
سهرت ليالى وضحيت بعمري الغالي في غربه ووجع وفجأة كبرو العيال
قالو كفايه تعبك يا امي خلاص بقينا رجال
شوفتي يمه ضهرك انحنى ياله قومي شدى الرحال
تعالى يمه معانا نعوضك وفي عنينا مهما العمر طال
اصلك زرعتي يا امي زرعه طيبه واليوم ياأمي بتحصدي زرع الحلال
كان نفسك يأمي فى بنت تمسح دمعتك احنا هنا نبوس تراب جذمتك يا أم الرجال
شوفت يا خال زرع الحلال لما ترويه بالحنان يحصد رجال فاهم يا خال
بقلم صفاء حسانين
تعليقات
إرسال تعليق