العاشق والليل.. بقلم الشاعر/د. علي مسلم عجمي
( العاشق و الليل )) .للشاعر د. علي مسلم عجمي
يا ليل طول سهر يا شمس لا تفيقي
موعود فيها تجيني بزحمة الأحلام
بالحلم بس منلتقي و بيزيد تشويقي
لما تقول لي جاييتك روح يلا نام
يا ليل خبي نجومك ما تعود تبان
و زيد بسوادك معاها عالوعد رح روح
موعد تلاقي و أحِبَّه ما إلو عنوان
و بالعتم كل شي يا ليل منعملو مسموح
يا ليل اسهر كتير كتير تا يحلا الكلام
بين الأحبة سهر ليل و إنسجام
القمر مرسال الهوى للعاشقين
و بالليل ما أجمل تباريح الغرامّ
رفعت إيديها للسما و ترسل كلام
تخاطب الليل بأماني في تعابيرو
يا ليل طَوِّل سهر يا ليل أوعى تنام
الليلة حبيبي عصدري فارش سريرو
مشتاق ليلة سهر ما نعيشها أحلام
حتّى الليلة القمر طارد نواطيرو
*****
تمشي بنص الليل تمشاية
نجوم السما لأجلك مضواية
و ركزي عيونك على وجه القمر
عملت القمر بيناتنا مراية
مبارحة.بالليل انتي و نايمة
شفت نحلة فوق منك حايمة
من بعد ما نقَّط عالمخدة عسل
خرجت و عم بتقول سفرة و دايمة
شعرها من الليل ماخذ إعتماد
و من شعاع الشمس باقة مشكَّلة
من الليل ماخذ شعرها كل السواد
و لونه من الخصلات عامل مكحلة
الشاعر د. علي مسلم عجمي
لبنان
تعليقات
إرسال تعليق