مرايتي.. بقلم الشاعرة/أميرة الغرباوي
مرايتي
🎶🎶🎶
مرايتي قول لي إيه جري
وملامحي ليه اتغيرت
فوق جبيني خطوط عريضة
وفي خدودي إترسمت خريطة
وتحت عيني هالات جريئة
ولا شعري ألوانه باهتة
حتي الضحكة مبقتش صافية
هو الزمن سرق شبابنا
واحنا خلاص أوام كبرنا
يعني خلاص ننسي حياتنا
ولا نجري تاني ورا حلمنا
ونعيش بقية عمرنا
تحت ضلة سقفنا
قولي بسرعة يا مرايتي
سايباني ليه أنا وحيرتي
سامعاكي رافضة لكلامي
واجهيني طيب بحقيقتي
عشان خلاص بتوه مني
..........
حبيبتي إنتي زي م أنتي
أوعي أبدا تبصي برة
شوفي نفسك ويا صبرك
وإنتي كتير بتداوي جرحك
قد إيه كنتي صلبة
ولا يوم في أزمة كسرت عزيمتك
وإزاي وقفتي جنب بنتك
لما كانت تحتاج لحضنك
وكنتي تبقي ليها أخت
لما كانت في يوم تفضفض
وإزاي صاحبتي بردة إبنك
لما قالك إنه حب
كنتي حكيمة والزمام منك مفك
وقت الجد كنتي راجل
واقفة بقوة لكل غادر
ووقت الفرح كنتي انتي
أصل الفرح وكل حب
روحك حبيبتي لسة عايشة
جوة منك حرة وطليقة
للخير معاها ألفين طريقة
لغيرها هي بتكون مفيدة
أصل روحك أبدا ماشابت
ولا إتغيرت هي بخريطة
وبلاش تبصي في المرايا
إللي بتعمي عنا الحقيقة
دي أصلها من صنع بشر
بتعكس صورة للبشر
أما الحقيقة جوة منا
يعلمها دايما رب البشر
.......
عرفتوا مين أكون أنا
أنا الضمير.....إنت أنا
أنا إللي بسري جوة دمك
أنا إللي عارف إيه حقيقتك
أنا إللي عايش ويا طيبتك
لا هأخدعك ولا يوم هأنافقك
بلاش تبص للمظاهر
وإنت معاك كل الجواهر
وإنت حقيقي.....إنت أنا
......بقلم.......
أميرة الغرباوى
🎶 🎶 🎶 🎶
تعليقات
إرسال تعليق