العصفور والقفص.. بقلم الشاعر/د. علي مسلم عجمي
(العصفور و القفص)..للشاعر د. علي مسلم عجمي
---------------------------- .
شو رجّعك عالقفص يا عصفور
ليش رجعت شو جانحك مكسور
أو إنت خايف من نسور السما
قلوب بعض البشر أقسى من النسور
طِـير كـل الجـو مِيدانـك
و غصن الشجر موجود عاشانك
ما انحكى مرة بْمجتمع لطيور
طير متلك غشّـك و خانك
بس الخيانة ساكنة قلوب البشر
من عهد آدم ..كان بالجنة و ظهر
و قابيل مع هابيل يا عصفور
رسالة ت ناخذ من معانيها عِبر
ليش تبقى بالقفص مأسور
طِـير. بتناديك جوقات الطيور
الأسر بيذل البعمرو ما انذل
و حريتك بيصير ما إلها مرور
طِـير يا عصفور عَللي بالسما
طالما ريش البجنحينك نما
تا يحصل الانسان عا حرّيتو
كتير يا عصفور عم يدفع دِمـا
كلكل لساني و جفِّت شفافي
اطلع و هَدّي عا غصن دافي
أو جنب نهر بحضن صفصافي
بتظل ليشك عالقفص لافي
اعشق الحرية بقلب صافي
أرضك..الجو الرحب لا تجافي
طِـير عا أبعد مدى قـافي
بيتك من غصون الشجر وافي
رفرف عجدول مَـي نفنافي
و إصدح متل أنغام شفافي
ما عاد بدي يا قفص كافي
شافي وجودك بالقفص شافي
اطلع و طِـير لأبعد مسافي
ما خلقت جوات القفص تا تعيش
تحرر و لا تبقى العمر غافي
الشاعر… د. علي مسلم عجمي
لبنان
تعليقات
إرسال تعليق