حي ولا ميت.. بقلم الشاعر/عبدالله رجب أبو عدنان
حي ولا ميت.
عبدالله رجب ابوعدنان
غيبوبه ودوخة
ونفس مقبوضة
افتحو شبابيك الاوضة
وأقرأو القرآن
روح بتتسحب
وزوجة بتندب
واخوة تضرب كف على كف
والكل مستغرب
وروشة م الجيران
سخونه وقلب موجوع
تفيد بايه الدموع
صرخة ولا صوت مسموع
والجسد همدان
وناس حوليا بتتعاتب
وكل عايز يتحاسب
والوقت مش مناسب
للزمجرة و الغليان
فات ايه الموكوس
طول عمره منحوس
لا دهب ولا فلوس
شوية ورق وأشعار
مكتوب فوقيهم أبو عدنان
عجلو بسرعه اوام
قبل ما يكتر الغمام
كفاية عليه كدة تمام
محتاج شفقة و إحسان
حي ولا ميت
حتى لو متصيت
ف حضن الورق يبيت
لفوة ف اكفان
دنيا وكل اللي فيها تعب
عدت برسالة عتب
اوعى تقول حسب
أو تأمن للزمان
الصوان قلب لفرح
والغمام بقى صبح
لكن لسة باقي الجرح
والحاجة الأكيدة
صوت الكروان.
حي ولا ميت..
عبدالله رجب ابوعدنان
تعليقات
إرسال تعليق