مش أي ناس ،ناسك...بقلم الشاعرة زكية فيصل
مش أي ناس ناسك
كلمات زكيه فيصل
صحيح معرفة الناس كنوز لكن مش أي ناس
يعني مش بالعدد والكترة وتلم ناس وخلاص
صحيح الدنيا لو جنة من غير الناس ماتنداس
صحيح الوحدة مُرة ووجودنا مع بعض أساس
لكن واجب عليك تنضف دايرتك وترتبها
هتلاقي ناس مش ناسك ومش شبهك سيبها
هتلاقي ناس مش حباك لكن إنت حببها
هتلاقي ناس مش عايزاك سيبها بقي لنصيبها
هتلاقي ناس برة الدايرة تستاهل تكون جواها
وناس كتير جوة الدايرة لازم تتطلع براها
هتلاقي ناس متبتة في إيدك أوي ومسكاها
هتلاقي ناس وإنت بعيد تحس روحك وياها
وناس مهما تقرب تحس نفسك عنها بعيد
وناس وجودها يخلي أيامك كلها عيد
هتلاقي ناس في عتمتك شموع بتنور وتقيد
وناس وقت حزنك لو قربت الحزن يزيد
ناس تحس بفرحتها من قلبها وقت فرحك
وتحزن قبلك لو حست مرة بضيقك وحزنك
وناس وقت فرحك تتمني لو ينزل دمعك
ووقت حزنك يفرحوا ويحاولوا يزودوا ألمك
الناس معادن منها الدهب والقشرة
خليك بس مع اللي بيصون العشرة
ركز مع الناس اللي وقت شدتك حاضرة
خليك بس مع اللي يخلي سكتك خضرا
✍🏻 زكيه فيصل
تعليقات
إرسال تعليق