خليك قنوع.. بقلم الشاعر/جمال زكى عينر
( خليك قنوع ) :
خليك قنوع إياك تطمع
الدنيا ان راحت ما بترجع
و اللقمة بتحلى ببركتها
وإن غيرك عازها إياك تمنع
خليك قنوع باللي ف ايدك
ربك بقناعتك حيزيدك
واوعاك. تسمع كلام الطماع
ده مفيش طماع يوم حيفيدك
خليك قنوع وبلاش تحكي
ولغير الله إوعاك تشكي
دي الشكوى لغير الله مذله
اركع واسجدله كمان وابكي
ربك رزاق وبيسترها
بس الأرزاق جايه ف دورها
إوعاك. تستعجل على رزقك
بعد الضلمه جايلك نورها
ما تشيلش الهم إرمي همومك
إضحك للدنيا وعيش يومك
حتلاقي الدنيا بتضحكلك
غصبٍ عنها ومش حتلومك
إشكر ربك واحمد خيره
والله ماليك أبداً غيره
قال لك اطلبني حتلقاني
يعلم سر الكون ومصيره
بِقَلَمِي الشَّاعِر جَمَال زَكِي عِينَر
تعليقات
إرسال تعليق