يوم عيدك.. بقلم الشاعر/حاتم عومر
يوم عيدك كم عيد عليه مضيت
فجعة قلبي يصعب علي نسيانها
إشتاقولك حتى حيطان البيت
وفاحت نسايم من خفايا أسرارها
إشتقت لروح غابت وما داريت
وإشتاقت نفسي لضمة أحضانها
سريب الغلا كامل بيه وفيت
وسريبك غاب وغاب عني حنانها
ياما سهرتي الليل عليا وتربيت
ربة عزيزة و صرت في وجدانها
سنين عدت وماضي عليا ريت
وعدن أيام حزينة وخلت مكانها
قدر العالي خداك حزنت بكيت
ذكرى جميلة كنت في بستانها
نسيم عطرك مازلت ما جافيت
فايح في روحي و عطر أركانها
ذكراك يا أمي ما يوم نسيت
أيام حلوة وكلام زاهي لسانها
وجودك معانا وقت بيه حليت
وقتي و قلبي و زاهي عنانها
رحمة ربي ليك بيها ناجيت
و غفران و رضوان في جنانها
ولينا الصبر و صابر و صريت
ونطلب رب العالي إنال رضوانها
وبيدي التراب عليك حطيت
وعلينا يحطوا التراب وقت أوانها
..... مع تحياتي ..... حاتم عومر .....
تعليقات
إرسال تعليق