وقفت بجانبي.. بقلم الشاعر/د. علي مسلم عجمي
(وقفت بجانبي)للشاعر د. علي مسلم عجمي
-------------------
وقفت بجنبي و إيدها عا خدها
وحدها و ما خَبَّـرِت شو بدها
وقت الظهر تقريباً و تِرم الغدا
وَسواس راسي قال بدو يشِدها
وردة بإيدي ملفلفة بعطر الندى
وَهَـبْتها يَّاها تا إكسب ودها
وصِل تَنهيدِة تواصل عالهدا
و هِـيي على الوردة إيديها تمدها
وسط هذا الموقف عْليي بَـدا
وَهج عاطفتي و حناني و كَـدّها
وَلَّـعِت فيي شوق كاين عا حِدا
وْرِثتو بمراهقتي ال ما عرفت حَدّها
واجَهت.. لا ما اقدرت إتحمل ردى
واضح ما بدي عن شعورا صِـدها
وْثَقِت فيها و قِلِـت بدي واعِـدا
وجهاً لوجه و مين بدو يردها
وعدي لإلها بيوم أحمر قاصِـدا
ومضة غرام و سهر تِطلع قَـدها
وضعي لأبعد حَد بطيورو شدا
ولما وصِلْت و جيت إمسك يدها
وعِيت من نومي طلِع حكـيي سُدى
وسادة الأحلام كانت خاليـة
و ما عرفت منها مزحها من جَـدها
الشاعر د. علي مسلم عجمي
لبنان
تعليقات
إرسال تعليق