حاتقوله ايه يوم ماحاتجيك المنية..؟!!!! ...بقلم الزجال يسري عثمان
حاتقوله ايه يوم ماحاتجيك المنيه
*******
والله حلمك كان فشوش
والنتيجه والاكاده في الوشوش
نفسك في الماسوره اوحته دوش
لما شوفت اللحمه قولت يارب حوش
كنت عاشق للحيطان والا الشوارع
لسه حلمك دايب في جوز الكوارع
فوقت عالفول اللي خاصم حتي زيته
واللي راجع م الطريق ماعرفش بيته
واللي يسعي طول نهاره وجيبه فاضي
واللي شارب كوز مراره بس راضي
والعيال واقفه تنادي عا المافيش
والا .ديك الفرخه اللي بس ريش
اللي مات عطشان مش لاقي ميه
واللي كان كلمة آدانه يارب عيش
واللي مات م القهر مالهش ديه
قولي ليه ختموه وعملوله فيش
قوم واصرخ يلا نادي عالنهار
قوم ولم عيالك قبل الانفجار
بس حرص م اللي صوب لك عيار
إبقي سلم له انت روحك هديه
فيها ايه لما تبقي انت الضحيه
مانت رقصت لما عروا ستر الوليه
كنت فاكرها حاتبقي جنه ولك وسيه
حاتقوله ايه يوم ما حاتجيك المنيه
تعليقات
إرسال تعليق