يعني إيه كلمة ألم.. بقلم الشاعر/أشرف فايد
يعني إيه كلمة ألم؟!
__________
يعني إيه كلمة ألم؟!
يعني دمعة يتيم
قلبه للحنان بيحن
يعني كسرة قلب فقير
لكسرة خبز لهفته بتجن
يعني مقهور من الظلم
صرخته في الودان بترن
يعني مريض عايش ومن
كثر الوجع قلبه بيئن
مش حاسس بوجعه حد
لا من الإنس أو الجن
_______
يعني إيه كلمة ألم ؟!
يعني إنسان عايش
في الذكريات وخايف
من الزمن
يعني إنسان عايش
في الحاضر ومش قادر
على المحن
يعني إنسان عايش
في المستقبل وناسي إن
فيه كفن
يعني إنسان عايش
غريب ومايعرفشي معنى
كلمة وطن
_________
يعني إيه كلمة ألم ؟!
يعني إنسان عايش ومن
جواه مش مرتاح
زي عصفور نفسه يطير
وهو مكسور الجناح
بيغرد والناس بتحسبه غُنَى
وهو قاصده نواح
ازاي يبكي والبكى
في طبعه غير مباح
بقلمي/ أشرف فايد
تعليقات
إرسال تعليق